ROXAS CITY – Arestado ang duha ka manugbaligya sang prutas, matapos sa ginkasa nga drug buybust operation sa Barangay Banica, Roxas City.
Ginkilala ang mga nagkaladakpan nga sanday Edilberto ‘Toto Boltron’ Laserna, Jr., 31-anyos kag Lilibeth Borines, 53-anyos, kag residente sang nasambit nga lugar.
Sa impormasyon nga nakuha sang Bombo Radyo nagikan sa Roxas Component City Police Station, ginapahayag nga ginakabig
High Value Individual (HVI) sa Drugs Watchlist sang kapulisan ang nasambit nga mga arestado.
Nakuha sa posesyon nanday Laserna kag Borines ang 19 ka sachets sang ginapatihan shabu, may kabug-aton nga 55 gramos kag nagabalor sang P374,000, P100 buybust money kag P9,900 nga counterfeited money.
Kaso nga paglapas sa Republic Act 9165 ukon Comprehensive Dangerous Drugs Act of 2002 ang paga-atubangon sang mga nagkaladakpan.
Sa karun, yara na sa kustodiya sang Roxas City PNP ang nasambit nga mga arestado para sa nagakaigo nga disposisyon.
