ROXAS CITY – Pilason ang mag-utod nga lunsay mga menor de edad matapos nga nabungguan sang tricycle sa Barangay Candual, Panay, Capiz.
Base sa inisyal nga imbestigasyon sang Panay Municipal Police Station nga samtang nagabakal ang mag-utod sa tiangge aksidente na lamang ang mga ini nabungguan sang tricycle nga ginamaneho ni Renato Esmolada 48-anyos sang Barangay Punta Tabuc sining siyudad.
Nahibaluan nga gikan si Esmolada sa Barangay Loctugan sining siyudad kag padulong na kuntani sa Panay Proper sang nadulaan ini sang kontrol sa pagmaneho rason nga nabungguan sini ang mga biktima.
Bangud diri, nag-angkon sang pilas sa lawas ang mga biktima nga madasig naman gindala sa Roxas Memorial Provincial Hospital para dapatan sang nagakaigo nga pagbulong.
Nahibaluan nga yara sa idalom sang impluwensya sang makahulubog nga ilimnon ang driver sang natabo ang aksidente.
Temporaryo naman nga ginkustodiya sa Panay Municipal Police Station si Esmolada kag ang tricycle sini para sa nagakaigo nga disposisyon.
