ROXAS CITY – Nakakutkot sang duha ka mga kalabera sang tawo ang construction worker sa ginapatindog nga civic center sa Barangay Casanayan, Pilar, Capiz.
Duha ka metros pa lamang ang ginakutkot nga duta sang trabahador sang makita ang nagalabaw nga tul-an tobtob makita sini ang duha ka mga kalabera sang tawo.
Nagapati ang mga residente nga ang mga kalabera ginlubong sang panahon sang mga katstila sa amo nga lugar bangud ba-se sa mga estorya nga nagserbe nga garrison ang lugar sa diin nakutkutan ang mga kalabera.
Nahibaluan nga indi lamang ini ang una nga bes nga nakakita sang kalabera sa Barangay Casanayan, sa diin sadto may nakutkutan man sa plaza kag pila ka area sa nasambit nga barangay.
Indi pa mahibaluan sa karon kung lalaki ukon babae ang nasapwan nga mga kalabera.
Sa karon ginsulod sa sako ang mga kalabera samtang ginahulat ang mangin disposisyon sang punong barangay.
