ROXAS CITY – Ginpasarado ang duha ka mga establisyemento ukon kalan-an sa Barangay Baybay, Roxas City.
Ini ang kasunod sang implementasyon sang closure order sang Bureau of Internal Revenue (BIR).
Kalakip sa ginpasarado amo ang El Maria’s Palabok House and Resto kag RML Manokan Haus.
Ginpahayag ni Nelia Demalata, ang Revenue District Officer sang BIR, ang pagpasarado sa nasambit nga mga kalan-an ang bangud sang kapaslawan sang mga tag-iya nga magbayad sang ensakto nga buwis ukon under declaration of sales.
Masobra 30 porsyento suno kay Demalata nga mas manubo ang deklarasyon sang nasambit nga mga establisyemento sang ila nga sales ukon kita.
Gin-athag naman ni Demalata nga temporaryo lamang ang nasambit nga closure order kag mahimo maka-operate liwat ang nasambit nga mga establisyemento sa tion nga maka-comply ang mga ini sa BIR.
Gindugang pa ni Demalata nga masangkaron suportado sini ang kampanya sang gobyerno sa pagpangolekta sang husto nga buwis.
