ROXAS CITY – Dismayado ang Presidente sang United Roxas City Commuters Tricycle Operators Drivers Association ukon URCC TODA sa duha ka mga city councilors nga ginaalegar naga-upang agud ma-aprubahan ang Memorandum of Agreement sa tunga sang Roxas City government kag Gerry Roxas Hublag Foundation para sa emergency loan sang mga tricycle drivers.
Ginpahayag ni Mr. Policarpio Juralbar nga nagapasalamat sila sa nangin inisyatibo ni Mayor Ronnie Dadivas nga nagtan-ay sang bulig sa ila nga apektado sang Libre Sakay sang Modernized Public Utility Jeep (MPUJ’s).
Apang ba-se sa impormasyon nga nakalab-ot sa ila nga wala naaprubahan sang City Council ang memorandum para maka-emergency loan na ang mga tricycle drivers bangud sa ginaalegar pagpamatuk nanday City Councilors Midelo Ocampo kag Moreno ‘’Moring’’ Gonzaga.
Suno kay Juralbar nga daku nga bulig ang emergency loan sa ila nga mga drivers bangud nagpromesa ang gobyerno sang syudad nga sila ang maabaga sang interes kag ang principal lamang sang ila gin-utang ang ila nga pagabayaran.
Nagalaum sila sa URCC TODA nga updan sang duha ka mga konsehal ang maayo nga tikang sang alkalde sang syudad agud mabuligan sila nga mga tricycle drivers nga nagapanghakroy na sa kapiut sang pangabuhi.
