ROXAS CITY – Nagapabilin karon sa kustodiya sang Roxas City Police Station ang duha ka mga persona matapos nga ginaalegar naglapas sa ginpatuman nga curfew hours sa probinsya sang Capiz.
Una diri nga nadakpan amo ang isa ka security guard nga si Jose Ricardo Borda matapos nga napaslawan nga makapakita sang iya nga quarantine pass kag id sa mga opisyales sang barangay sa Barangay Adlawan, Roxas City.
Nanotaran man nga yara sa idalom sang impluwensya sang makahulubog nga ilimnon si Borda.
Samtang, nadakpan man ang isa ka 49-anyos nga si Rogen Bersabal matapos nga ginaalegar nga nagalagaw nga hubog sa Barangay Tanque sining siyudad.
Mahibaluan nga ginapatuman sa karon sa bilog nga probinsiya sang Capiz ang curfew hours humalin alas 8 sa gab-i tubtob alas 5 sa aga base sa Executive Order No. 11, series of 2020 nga ginpapanaog ni Capiz Governor Esteban Evan Contreras.
