Nanawagan si House Speaker Faustino Bojie Dy III sa mga Pilipino nga himuon ang pagdumdom sang Semana Santa nga tion sang pagpamalandong, pagbag-o, kag pagpasalamat.
Suno kay Dy, nagakaigo sa tion ang balaan nga selebrasyon ilabi na nga madamo nga mga Pilipino ang padayon nga naga-atubang sang nagkalain-lain nga personal nga pagpanghangkat.
Dugang pa niya, ang mga leksyon sang pagsakripisyo, pagpatawad, kag paglaum nangin mas makahulugan sa subog nga tion.
Ginaagda man ni Speaker Dy ang tagsa ka Pilipino sa subong nga Semana Santa nga magdulog kag magpamalandong sa kahulugan sang adlaw nga ini.
Ginhatagan man niya sang importansya nga ang Semana Santa indi lang isa ka tradisyon kundi isa ka moral guide nga nagapahanumdom sang mga values nga nagapabaskog sang paghiliusa kag kalig-on sang pungsod.
Ginhingyo man ni Dy ang publiko nga ipatuman ang ila pagpamalandong paagi sa pagpabakod sang ila pagtuo, pagpadalom sang kaangtanan sa pamilya, kag pagpakita sang matuodtuod nga pag-ulikid sa iban.
Nagalaum si Dy nga ang espiritu sang Semana Santa magaserbe nga inspirasyon agud labi pa nga mapabaskog ang paghiliusa kag kolektibo nga responsibilidad sa pagtukod sang mas maluluy-on kag malig-on nga pungsod.
