-- ADVERTISEMENT --

Ginkumpirma ni Manila Representative Joel Chua nga nasumite na sang House prosecution team sa Office of the Ombudsman ang mga ebidensiya batuk kay Vice President Sara Duterte may kaangtanan sa ginaalegar paggamit sang confidential funds kag bribery.

Suno kay Chua, ginabulubanta nga sang Oktubre pa nila nasumite ang mga dokumento agud sabton ang subpoena nga ginpagwa sang Ombudsman.

Lakip sa mga ebidensya amo ang ginaalegar maanomaliya nga paggamit sang P612.5 million nga confidential funds, lakip na ang P125 million nga gingasto sa sulod lamang sang 11 ka adlaw sang Disyembre 2022, kag mga alegasyon sang pagsuhol sa mga opisyal sang DepEd.

Dugang pa ni Chua, nagtipon pa sila sang dugang nga ebidensiya nga mahimo magamit sa pagpalig-on sang mga kaso nga posible nga ipasaka batok sa bise presidente.