-- ADVERTISEMENT --

Nagpahanumdom ang isa ka health expert sa importansya sang pag-atipan sang ikaayong lawas kadungan sang World Diabetes Day lakip na ang mga sintomas sini, posible nga komplikasyon kag mga pamaagi agud malikawan ukon makontrol ang amo nga balatian.


Sa interview sang Bombo Radyo kay Dr. Maria Saria G. De Tomas, Medical Officer III sang Tapaz District Hospital, iya ginpahayag nga ang tagsa ka indibidwal ang may daku nga risgo sang diabetes, bangud isa ini ka balatian nga mahimo magresulta sa seryoso nga problema sa ikaayong lawas kon indi ma-diagnose kag makontrol sang temprano.


Suno kay De Tomas, ang diabetes isa ka chronic disease nga nagakatabo kon indi makahimo sang bastante nga insulin ang pancreas ukon indi nagagamit sang lawas sing husto ang insulin nga responsable sa pagkontrol sang lebel sang glucose sa dugo.

Pahayag pa sini, may duha ka sahi sang diabetes. Una amo ang Type 1 Diabetes, nga nagakatabo kon ang pancreas wala ukon halos wala na nagaproduce sang insulin bangud ginahalit sang immune system ang mga selula nga nagahimo sini.

Ikaduha amo ang Type 2 Diabetes, nga mas masami makita sa mga adulto, apang mahimo man ini matabo sa mga pamatan-on. Sa sini nga klase, indi nagagamit sing husto sang lawas ang insulin ukon indi na makahimo sang bastante sini.

-- ADVERTISEMENT --

Lakip sa mga sintomas sang diabetes amo ang masami nga pagkauhaw, masami nga pag-ihi, madasig nga pagkapoy, pagdulom sang panan-aw, wala ginapaabot nga pagnubo sang timbang kag masami nga pagkagutom.

Dugang pa sang natungdan, may daku man nga papel ang komunidad sa pagpakigbato kontra diabetes paagi sa pagpatigayon sang health education campaigns, libreng blood sugar screening, mga programa nga nagapromote sang physical activities kag paghatag sang impormasyon tuhoy sa husto nga nutrisyon.