Tatlo ka persona, lakip ang amay kag anak, ang nadakpan sang Philippine Drug Enforcement Agency (PDEA) sa ginapatihan drug den sa, Barangay VII, Roxas City, pasado alas onse sang udto sini nga adlaw Domingo, Nobyembre 22.
Ginkilala ang mga nadakpan nga sanday Alyas Gary, 54 anyos, ang iya nga anak nga si Alyas Kenneth, 32 anyos, isa ka construction worker, kag Alyas Leo, 44 anyos, nga hair dresser. Lunsay mga residente sang nasambit nga barangay.
Sa interview sang Bombo Radyo kay Agent Rodito G. Lobaton Jr., Assistant Provincial Officer kag Provincial Intelligence Officer sang PDEA Aklan, iya ginpahayag nga gin-monitor na sang ila ahensya ang subject sa sulod sang tatlo ka semana tubtob isa ka bulan bangod sa ginapatihan nga pagbaligya sini sang iligal nga droga sa Barangay VII, partikular sa idalom sang Jumbo Bridge.
Suno kay Lobaton, wala lamang ginapatihan nga nagabaligya sang iligal nga droga si Alyas Gary, kundi ginagamit man sini ang iya puluy-an bilang drug den, diin nagakadto ang iya mga parokyano agud magbakal kag magkuha sang iligal nga droga.
Pahayag pa niya, ang ginapatihan nga source sang supply sang droga sang suspek amo ang isa pa ka drug personality sa Roxas City, nga padayon pa nila nga gina-imbestigaran. Nakuha man suno sa opisyal ang impormasyon parte sa aktibidad sang suspek halin sa mga report sang barangay kag confidential informants.
Dugang pa sang natungdan, natabuan ang tatlo ka nadakpan sa tion sang ila buy-bust operation, kun sa diin ang anak ni Gary nga si Kenneth ginapatihan nga nagabulig man sa pagpatigayon sang illegal drug activities sang iya amay.
Sa nasambit nga operasyon, narekober ang isa ka sachet sang buy-bust item kag pito pa ka sachets sang ginapatihan shabu, lakip ang mga drug residue kag drug paraphernalia.
Suno kay Lobaton, ginabulubanta nga nagabalor sang P100,000 ang street value sang narekober nga droga, samtang yara sa P136,000 ang estimated standard price sini. Ginpaathag man niya nga kinahanglan pa ini nga ipaagi sa laboratory examination agud makuha ang eksakto nga kabug-aton kag resulta sang laboratory testing.
Nahibaluan nga ginakabig sang mga operatiba bilang High Value Targets ang mga nadakpan.
Sa karon, magapangatubang ang mga nadakpan sang nagakaigo nga kaso sa paglapas sa Republic Act 9165 ukon Comprehensive Dangerous Drugs Act of 2002.
Sa pihak sini, ginapanawagan ni Lobaton ang kooperasyon sang mga pumuluyo, ilabi na sang mga barangay officials, sa pag-report sang mga ilegal nga aktibidad agud mapabilin ang katawhay kag seguridad sa ila tagsa ka komunidad.










