Nagapangayo sang bulig ang isa ka iloy halin sa Cotabato agud mabuligan kag maluwas ang iya bata nga Overseas Filipino Worker ukon OFW nga ginapahayag nga ginamaltrato sa Saudi Arabia.
Sa interview sang Bombo Radyo kay Anly Carman, iloy ni Melba Carman, iya ginpahayag nga tuman na ang kabudlay nga ginaagyan sang iya bata sa nasambit nga pungsod, bangod suno sa iya, tinapay nga ban-os kag tubig na lamang ang ginakaon sini agud mabuhi.
Suno kay Carman, masakit para sa iya bilang iloy nga mahibaluan ang sitwasyon sang iya bata nga nagaantos sa iban nga pungsod, ilabi na nga limitado lamang ang pagkaon nga ginahatag sa sini.
Nakig-angot na sila sa recruitment agency nga nagpadala sa iya bata sa Saudi Arabia agud mangayo sang gilayon nga aksyon kag bulig sa pag-rescue diri, apang tubtob sa karon wala pa sila nakabaton sang aksyon halin sa nasambit nga agency.
Pahayag pa ni Carman, ang asawa sang iya bata nagpadulong naman sa Overseas Workers Welfare Administration ukon OWWA agud magpangayo sang dugang nga bulig kag mangita sang paagi para mabuligan si Melba.
Nagapanawagan karon ang iloy sa mga ahensya sang gobyerno, ilabi na sa mga opisina nga nagaatipan sang kaayuhan sang mga OFW, nga aksyunan ang ila sitwasyon kag buligan nga marekober kag mapabalik sa Pilipinas ang iya bata.
Dugang pa sang natungdan, nagalaum siya nga indi na magdugay ang pagresponde sang mga natungdan agud masiguro ang kaluwasan sang iya bata kag malikawan nga maglala pa ang sitwasyon nga ginaagyan sini sa Saudi Arabia.











