Padayon nga ginapabaskog sang Jamindan Municipal Police Station (MPS) ang kampanya batuk sa pagbaligya, pag-instalar kag paggamit sang open ukon modified mufflers sa banwa sang Jamindan, Capiz.
Nagpatigayon ang mga kapulisan sang information dissemination kag ocular inspection sa idalom sang pagpamuno ni PMAJ Jaypee D. Silvestre, Officer-in-Charge sang Jamindan MPS.
Ginkadtuan sang mga otoridad ang nagkalain-lain nga balaligyaan sang motorcycle parts and accessories kag mga talyer agud pahanumdomon ang mga tag-iya kag mekaniko parte sa municipal ordinance nga nagadumili sa pagbaligya, pag-instalar kag paggamit sang open ukon modified mufflers.
Tuyo sang kampanya nga malikawan ang sobra nga gahod ukon noise pollution nga nagadala sang perwisyo sa mga pumuluyo, ilabi na sa mga pasyente, estudyante kag mga nagapahuway sa gab-i, agud mapabilin ang kalinong kag katawhay sa komunidad.
Ginapangabay man sang Jamindan PNP ang kooperasyon sang mga negosyante kag tag-iya sang talyer nga indi magbaligya ukon mag-instalar sang ginadumilian nga mga muffler agud malikawan ang paglapas sa ordinansa kag ang nagakaigo nga penalidad.
Samtang, ginpaandaman sang kapulisan nga magapadayon ang ila checkpoint kag mobile patrol operations agud masiguro ang pagsunod sang mga motorista sa municipal ordinance kag sa mga nagakaigo nga regulasyon sang Land Transportation Office (LTO).











