Ginatun-an sang administrasyon ni Marcos ang posibilidad sang pagsulod sang Pilipinas sa negosyo sang space launch sites sa tunga sang pagpasangkad sang SpaceX operations ni Elon Musk.
Suno kay President Ferdinand Marcos Jr., ang tinutuyo sang Pilipinas indi nga mangin kaangay sang NASA ukon magpadala sang tawo sa bulan kag Mars, kundi makabenepisyo sa potensyal sang pungsod bilang lokasyon sang rocket launch sites.
Gin-athag sang Presidente nga may daku nga bentaha ang nahamtangan sang Pilipinas bangud yara ini sa western part sang Pacific Ocean.
Sa tion nga ipalupad ang mga rocket, ang direksyon sang ila pagkahulog ginasiling nga mas luwas bangud sa kadagatan kag malayo sa mga lugar nga may pumuluyo.
Dugang pa ni Marcos, tinutuyo sang pungsod nga panginpuslan ang ini nga lokasyon agud makasulod sa nagasangkad nga industriya sang space launch services.











