Nagpahanumdom ang Simbahan Katolika sa mga tumuluo parte sa importansya sang selebrasyon sang Christ the King ukon ang pagkilala kay Hesukristo bilang Hari sang bug-os nga kalibutan.
Ang selebrasyon sang Christ the King ginahiwat sang katapusan nga Dominggo sang liturgical year sang Simbahan Katolika, antes magsugod ang bag-o nga liturgical year sa panahon sang Advent.
Sa interview sang Bombo Radyo kay Fr. Virgilio Funte Ciudadano Jr., Rector sang Major Seminary sang Archdiocese of Capiz nga Sancta Maria Mater et Regina Seminarium sa Barangay Cagay, Roxas City, iya ginpahayag nga ang selebrasyon isa ka pag-affirm ukon liwat nga pagpahayag sang pagtuo sang mga Katoliko kay Hesukristo .
Suno kay Fr. Ciudadano, indi lamang ini isa ka ordinaryo nga selebrasyon sa kalendaryo sang Simbahan, kundi isa ka oportunidad para sa mga tumuluo nga pamalandungan kag pabaskugon ang ila nga pagtuo.
Pahayag pa sini, importante man ang partisipasyon sang mga kabataan parte sa kahulugan sang Christ the King agud mahangpan nila nga ang sini nga selebrasyon indi lamang parte sa popularity ukon sa kadamuon sang mga tawo nga nagaupod, kundi mas importante ang pagpabakod sang ila pagtuo bilang mga Katoliko.
Dugang pa niya, importante nga mahibaluan sang mga kabataan kag sang masunod nga henerasyon nga ang pagkilala kay Kristo bilang Hari dapat makita indi lamang sa mga selebrasyon ukon aktibidad sang Simbahan, kundi labi na gid sa ila pang-adlaw-adlaw nga pagginawi, pagpakita sang gugma kag pagrespeto sa isigkatawo.
Gina-imbitar man sang natungdan ang tanan nga mga tumuluo sang Simbahan Katolika nga mag-upod kag magpartisipar sa selebrasyon sang Christ the King bilang pagpakita sang ila pagtuo kag debosyon kay Hesukristo.











