Ginhingyo sang mga prosecutor sang International Criminal Court (ICC) sa Trial Chamber III nga ibasura ang hingyo sang kampo ni former President Rodrigo Duterte may kaangtanan sa pagpanghangkat sang pila ka mga ebidensya nga pagagamiton sa iya trial.
Sa isa ka publiko nga dokumento nga ginpaguwa sang Nobyembre 20, ang prosekusyon nagpamatuod nga ang pangabay sang depensa wala nagasanto sa mga pagsulundan kag mga pamaagi sang korte.
Suno sa prosecutors, kinahanglan nga mag-file ang kampo ni Duterte sang ano man nga objection sa admissibility sang mga ebidensya sa tion nga pormal na ini nga masumiter sa korte, suno sa Rule 64(1) sang Rules of Procedure and Evidence.
Nagpangabay man ang prosekusyon nga tadlungon ang ginaalegar sala nga pahayag sang depensa may kaangtanan sa pila ka testimonya nga kabahin sang trial.
Madumduman nga naghingyo ang kampo ni Duterte nga indi pagbatunon sang ICC ang nauna na nga narekord nga testimonya sang isa ka anay Davao City police officer.
Ginkwestyon ni Peter Haynes, abogado ni Duterte, ang paggamit sang amo nga testimonya bilang ebidensya.
Suno sa iya, kinahanglan nga pamatud-an anay nga indi na maka-atubang sa personal ang witness antes batunon ang iya nauna nga pahayag.











