Ginbungguan ang motorsiklo nga ginapahayag ginamaneho sang isa ka mangunguma sang isa man ka motorsiklo nga ginamaneho naman sang 18-anyos nga lalaki sa Barangay Duran, Dumalag, Capiz.
Ginkilala ang driver victim kay alyas “Mike”, 34-anyos, samtang ang driver suspek naman ang ginkilala kay alyas “Genesis”, 18-anyos kaupod ang mga sakay sini nga sanday alyas “Sheryl” kag alyas “Juve” nga lunsay mga residente sang nasambit nga lugar.
Sa interview sang Bombo Radyo kay PSSG. Christopher James Badilla, imbestigador sang Dumalag MPS, ginpahayag sini nga samtang gina-maneho ni Mike ang motorsiklo nagikan sa Brgy. Duran Proper, padulong sa balay sini sa Sitio Crossing Carmen sang hinali nalang nga nagpang-agaw sang linya ang motorsiklo nga ginamaneho ni Genesis, rason sang pagkatumba sang magtimbang nga bahin.
Dugang pa sini, nag-angkon sang pilas si Mike sa nawala nga porsyon sang tiil sini nga gilayon naman nga gindala sa Dao District Hospital, samtang si Genesis naman kag mga kaupdanan sini ang nag-angkon sang pilas sa ila tagsa ka mga lawas nga gilayon naman nga gindala sa ospital agud madapatan sang nagakaigo nga pagbulong.
Samtang, yara naman sa karon ang mga motorsiklo sang mga ini sa kustodiya sang Dumalag Municipal Police Station para sa nagakaigo nga disposisyon.
