2 LPA sa sulod guwa sang PAR, ginabantayan sang state weather bureau

Ginabantayan sa karon sang state weather bureau ang duwa nga low pressure area sa palibot sang Philippine area of responsibility (PAR) takna alas 8:00 kaina sang aga, Setyembre 15.

Ang una nga LPA sa sulod sang pungsod yara sa 440 kilometros sa nasidlangan sang Casiguran, Aurora.

Samtang ang pangaduwa naman ang nakit-an sa guwa sang PAR nga yara sa 2,145 kilometros sa nasidlangan sang Eastern Visayas.

Suno sa state weather bureau, gamay ang posibilidad nga mangin isa ini ka bagyo.

Subong man, kalabanan nga bahin sang pungsod ang mahimo nga makaeksperyensya sang magal-umon nga panahon nga may lapta-lapta nga pag-inulan ukon pagkilat kag pagpanaguob bangud sa southwest monsoon ukon habagat.