ROXAS CITY – Yara sa kabug-usan nga 542 nga mga PNP personnel ang igapalapta sang Capiz Police Provincial Office sa nagkalain-lain nga lugar sa probinsya kadungan sa patigayunon nga State of the Nation Address (SONA) ni President Ferdinand “Bongbong” Marcos Jr. subong nga adlaw, Hulyo 22, 2024.
Sa interview sang Bombo Radyo kay Police Lieutenant Sweelen Pinalba, Tagpamaba sang Capiz PPO, ginpahayag sini nga maga-deploy sila sang mga support unit kaangay sang traffic personnel, medical teams kag iban pa agud mapabilin nga malinong kag matawhay ang SONA ni PBBM.
Suno kay Pinalba, magapatigayon man sila sang boarder control partikular sa may bahin sang Barangay Dinginan, Banica, kag iban pa.
Kadungan sini, magapatigayon man ang tanan nga mga kapulisan sang banwa sang checkpoint agud matsekyar ang mga nagaguwa kag nagasulod sa probinsya.
Ginkumpirmar man ni Pinalba nga ang syudad pa lamang sang Roxas ang nagkuha sang permit agud magpatigayon sang hublag protesta sa adlaw sang SONA sang Presidente.
