ROXAS CITY – Patay ang 2 ka mga indibidwal samtang 1 naman pilason, matapos ginapahayag ginpanglabo mismo sa sulod sang ila puluy-an samtang nagakatulog sa Barangay Lapaz, Jamindan Capiz takna alas 12:00 sang maga-aga kaina Setyembre 29, 2023.
Ginkilala ang mga biktima nga sanday Archie Georlin , 21-anyos, Dindo Georlin 31-anyos lunsay residente sang Himamaylan, Negros Occidental kag Rodel Catalan 24-anyos residente sang Masbate apang temporaryo nga nagapuyo ang mga ini sa Brgy. Lapaz sa nasambit nga banwa.
Samtang ang ginapahayag suspek ang ginkilala kay John Villanueva Alyas Tatang, 22-anyos kag residente sang Himamaylan, Negros Occidental apang temporaryo man nga nagapuyo sa Brgy. Lapaz, Jamindan, Capiz.
Sa inisyal nga impormasyon nagikan sa Jamindan Municipal Police Station, ginpahayag takna alas 12:50 sang kaaganhon kaina sang nagpabalhag sang reklamo si Kagawad Ronalyn Llait sang amu nga Brangay nga may yara sang nagluntad nga pagpanglabo sa ila lugar.
Bangud sini, gilayon nga ginpadulungan sang kapulisan ang lugar kag ginapahayag nga samtang nagakatulog ang mga biktima sa sulod sang ila puluy-an, hinali na lamang nga nagsulod ang suspek kag ginpanglabo ang mga ini.
Maswerte naman nga nakapalagyo si Archie Georlin rason nga nakapangayo sang bulig apang ginbawian naman sang kabuhi sanday Dindo Georlin kag Rodel Catalan bangud sa patal nga pilas nga ila naangkon.
Sa karun, padayon pa nga ginabulong sa Mambusao District Hospital si Archie Georlin subong man pagpatigayon sang hot pursuit operation sang mga otoridad agud madakpan na si Villanueva matapos nga nakapalagyo matapos ang insidente.
