ROXAS CITY – Patay ang duha ka driver samtang pilason naman ang mga backrider sini matapos ang nagluntad nga pagbunggunay sang duha ka motorsiklo takna 11:14 kagab-i, sa Barangay Bolo, Roxas City.
Ginkilala ang mga napatay nga sanday Roy Catimbang, 32-anyos, manunudlo, residente sang Barangay Lonoy kag Fernan John Asogue, 19-anyos, graduating student residente sang Barangay Lanot, sini nga syudad.
Samtang pilason naman ang mga angkas sini nga sanday Cyril Aguilar kag Francisco Asogue.
Sandig sa imbestigasyon sang Roxas Component City Police Station, samtang ginasubay sang smash nga motorsiklo nga ginamaneho ni Catimbang sakay si Aguilar, ang dalanon nagikan sa Barangay Lonoy, padulong kuntani sa syudad, sang ini ang ginbungguan sang kasugata nga Honda PCX nga motorsiklo nga ginasakyan sang mag-utod.
Ginaalegar, nagpang-agaw sang linya ang mag-utod nga nagresulta sang pagbungguanay sang duha ka motorsiklo.
Bangud sa impact, lunsay nag-angkon sang patal nga pilas sa magkatuhay nga parte sang lawas ang duha ka driver kabangdanan sang ila gulpi nga kamatayon.
Samtang ang mga backrider naman ang padayon nga ginabulong sa magkatuhay nga ospital matapos nag-angkon sang injuries sa ila kalawasan.
Sa karon, ginkustodiya na sa Roxas City PNP ang imbolbado nga mga motorsiklo para sa nagakaigo nga disposisyon.
