ROXAS CITY – Nagapabilin nga ginabulong sa Roxas Memorial Provincial Hospital ang duha ka mga biktima matapos nga nadula-an sang kontrol ang ginamaneho nga motorsiklo sa Barangay Dulangan, Pilar Capiz.
Ginkilala ang mga biktima nga sanday Danilo Yentod, 62 anyos, driver sang motorsiklo kag Rene Crispino, 59 anyos, lunsay residente sang Poblacion President Roxas.
Suno kay Police Corporal Herbert Dela Vega, imbestigador sang Pilar PNP nga halin sa Coco Grove sa banwa sang Pilar ang duha ka persona kon sa diin may yara sang family bonding ang ila pamilya.
Nagapauli na ang duha ka mga biktima sakay sa motorsiklo apang pag-abot sa kurbadahon nga porsyon sang tulay sa nasambit nga lugar nadula-an sang kontrol ang manubela sang motorsiklo nga ginamaneho ni Yentod.
Bangud diri naka-sideswipe sila sa railings nga nangin rason sang ila pagkatumba.
Gilayon naman nga ginrespondihan sang mga emergency responders ang mga biktima kag gilayon nga gindala sa ospital.
Ginapatihan nga naka inom ang mga biktima sang nagluntad ang aksidente.
