ROXAS CITY – Nagpalanakit ang lawas sang duha ka mga indibidwal matapos ang nagluntad nga aksidente sa dalanon sa Barangay Lanot, Roxas City.
Ginkilala ang mga nagkalapilasan nga sanday Benjie Capapas, 32 anyos, residente sang Barangay Lonoy, driver sang motorsiklo kag Lorenzo Bacudo, 53 anyos, residente sang Barangay Bato, Panay kag driver naman sang tricycle.
Base sa inisyal nga impormasyon nga nakuha sang Bombo Radyo, padulong sa siyudad sang Roxas si Capapas sakay sa iya motorsiklo.
Apang pag-abot sa nasambit nga lugar, nasanggit ang iya kamot sang tricycle nga ginamaneho ni Bacudo nga magatuyo kuntani sang overtake sa isa ka salakyan.
Bangud diri, lunsay nagkalapilasan si Capapas kag Bacudo.
Nagpalanghubag ang nawala nga kamot ni Capapas samtang nakaangkon naman sang bali sa nawala nga tiil kag mga kasamaran si Bacudo.
Gilayon nga gindapatan sang nagakaigo nga pagbulong ang duha sang mga katapo sang Capiz Emergency Response Team (CERT).
