ROXAS CITY -Nagapadayon ang pag-ayam sang mga kapulisan sa duha ka mga suspetsado nga ginatudlo nagpuli sang labo sa 33-anyos nga mangunguma sa Barangay San Juan, Jamindan Capiz.
Ini ang ginpahayag ni Police Captain Peter John Pisueña, hepe sang Jamindan Municipal Police Station sang mainterview sang Bombo Radyo.
Ginpahayag ni Pisueña nga matapos nga ginpulihan sang labo sang duha ka mga suspetsado nga sanday Eric Valaquio kag Felomino Villeza ang biktima nga si Jomen Nicholas, madasig sila nga nakapalagyo.
Suno kay Pisueña nga nagapadayon pa ang pag-usisa sang mga kapulisan sa motibo sang krimen bangud wala man sang may gin-awayan ang magtimbang nga bahin antes natabo ang insidente.
Apang nakatu-ad pa suno diri ang biktima antes natabo ang pagpatay nga traidor ang duha ka mga suspetsado.
Samtang padayon man ang pagpangusisa sang mga kapulisan bangud ginapahayag nga imbulbado man sa iban nga mga krimen ang duha ka mga suspek.
Suno kay Pisueña nga si Valaquio ang may yara sang record sang pagpatay samtang si Villegas naman ang ginlabo man sadto ang utod sang napatay nga biktima.
Sa karun yara na sa isa ka punenarya ang bangkay sang biktima kag natalana na ipaidalum sa post mortem examination.
Mahibaluan nga sandig sa inisyal nga imbestigasyon, samtang naglakat pauli ang biktima kag duha ka mga suspetsado gikan sa gin-imnan nga balay, hinali gid lamang ginpulihan labo sang duha ka mga suspetsado ang biktima.
Gintinguhaan pa nga madala sa ospital ang biktima apang gilayon man nga ginbawian sang kabuhi matapos nga nakaangkon sang duha ka mga patal nga pilas sa liog kag likod.
