Sigma, Capiz – Ginhilway na sa karsel sang Sigma PNP ang duha ka suspek sa pagbuno patay sa 46-anyos nga lalaki sa Purok 5, Barangay Acbo, Sigma, Capiz.
Ini matapos nagpirma sang affidavit of non interest ang himata sang biktima batuk sa mga suspek.
Matandaan nga dead on arrival sa ospital ang biktima nga si Sanito Arcelis bangud sa naangkon nga patal nga pilas sa tiyan, liog, dughan kag likod sang ginbuno sang mga suspek nga sanday Jesus Baranet sang Mianay, Sigma, Capiz kag Romeo Altimo 19-anyos sang Barangay Acbo, Sigma.
Nagaguwa sa imbestigasyon sang Sigma PNP nga nagtuga sang eskandalo ang biktima sa balay ni Baranet rason nga ginpapauli ini.
Apang nagbaisay sila ni Baranet rason nga ginpaguwa sang biktima ang dala nga kutsilyo, apang nakuha ini sa iya.
Lipod sa ihibalo sang biktima nga may dala man nga kutsilyo ang isa ka suspek nga si Altimo nga amo ang gingamit sa pagbuno sa iya sang mga suspek.
