ROXAS CITY – Wala na sang kabuhi sang makit-an ang lawas sang biktima nga una na nga ginpahayag nalumos samtang nagatabok sa suba sa may bahin sang Liboon-Batiano, Mambusao Capiz.
Sa interview sang Bombo Radyo kay PCPT. Alladen Talaban OIC sang Mambusao Municipal Police Station, ginpahayag sini nga takna alas 6:30 kaina sang aga may nagpalab-ot sa ila sang report nga may yara sang lawas nga nagalutaw-lutaw kag ginapatihan nga iya ini sang 21-anyos nga lalaki.
Matandaan nga sadtong Huwebes, nagtabok sa nasambit nga suba si alyas “Toto” kaupod ang apat sini nga mga pakaisa apang hinali na lamang ini nga naglugdang kag wala na nakabutwa pa.
Gintestingan pa kun tani nga salbaron ini apang, bangud sa mabaskog nga current sang tubig wala na ini natigayon.
Bangud sini, gilayon nga nagpatigayon sang retrieval operation ang mga pumuluyo, opisyales sang barangay kaupod ang mga kapulisan apang napaslawan sila nga makit-an ini.
Sa karun yara na sa isa ka punerarya ang bangkay sang biktima.
