Amat-amat nga nagbalik ang operasyon sang Abu Dhabi International Airport matapos nga temporaryo nga ginpauntat bangud sa nagalala nga tensyon sa tunga sang Israel kag Iran.
Sa interview sang Bombo Radyo kay Bombo Mark Jore, International Correspondent direkta sa Sharjah, United Arab Emirates, iya ginpahayag nga nagbalik na ang pila ka flights, pero indi pa fully open ang airport kag gin-prioritize anay ang mga flights nga malapit lang ang destinasyon.
Suno kay Jore, ginpatuman ang mas hugot nga safety kag security protocols agud masiguro ang kaluwasan sang mga pasahero.
Git-athag man sang mga otoridad nga ang defense systems sang United Arab Emirates ang aktibo 24/7.
Ginpahanumdom ang mga pasahero nga magsunod sa mga direktiba, kag mag-monitor sang opisyal nga anunsyo.
Samtang ang Migrant Workers Office nagapadayon sa paghatag bulig sa mga Overseas Filipino Worker, lakip ang shelter, impormasyon, kag updates sa mga apektado nga Pilipino.
