ROXAS CITY – Gintawag nga ‘tunto’ ni Barangay Kagawad Renante Araw-araw ang 21 anyos nga lalaki nga isa ka Locally-Stranded Individual nga residente sang Barangay Libas, Roxas City nga nag-positibo sa coronavirus disease (COVID-19).
Ini matapos makabaton sila sang impormasyon nga samtang wala pa nagaguwa ang resulta sang real-time polymerase chain reaction (RT-PCR) test sang amo nga LSI, naga-guwa ini sa ila nga barangay quarantine facility kun gab-i kag naga-inom.
Suno kay Araw-araw nga nakasugid ang pila ka residente nga ila nakit-an ang amo nga persona nga nagaguwa kun gab-i kag nagapakigkita sa iya mga abyan agud mag-inom.
Gindugang pa sini nga may mga nakasugid man sa ila nga ginadul-ungan pa sang iya mga barkada ang nasambit nga lalaki sang makahulubog nga ilimnon sa ila nga quarantine facility.
Aminado man ang konsehal nga wala sang may nagabantay nga opisyales sang barangay kun gab-i rason nga masami nga nagaguwa ang amo nga pasyente.
Suno naman kay Barangay Kagawad Rodel Curativo, natukiban sa ila pagpangusisa, may ginasugo ang amo nga LSI nga nagabakal sang sigarilyo kag iban pa nga ginadul-ong sa amo nga pasilidad.
Ginpasalig man ni Curativo nga ila kompirmahon ang amo nga mga impormasyon agud makapatigayon sila sang contact-tracing kag mapaidalom sa nagakaigo nga tests ang mga nakahalubilo sang amo nga indibidwal.
Ginabasol naman ni Punong Barangay Richard Arrojado ang Roxas City government sa natabo bangud dapat kuntani suno diri, antes papulion sa siyudad ang mga LSI’s, sa ila pa lamang ginhalinan nga lugar, ginpaidalom na sila sa laboratory tests.
Sa karon nga naga-positibo ang mga LSI’s, kasubong ginhatagan pa sila sang problema sa barangay ilabi pa nga dapat may nagakaigo nga pasilidad nga pahamtangan sang mga naga-positibo sa amo nga balatian.
Luyag man kuntani ni Arrojado nga amligan ang ikaayong-lawas sang iya mga pumuluyo gani nagaapelar ini sa gobyerno sang siyudad nga kuhaon sa ila lugar ang nag-positibo nga LSI.
Mahibaluan nga sadtong Hulyo 17 nag-abot ang nasambit nga LSI sa Barangay Libas gikan sa Metro Manila kag nagguwa nga positibo ini sa nasambit nga balatian sadtong Hulyo 25, 2020.
