Patay ang isa ka 24-anyos na babae matapos hampason sa ulo sang martilyo kag bun-on sang dati niya nga nobyo sa sulod sang apartment sa Cebu City.
Ang krimen, nasaksihan sang anum ka tuig nga bata sang biktima.
Suno sa mga otoridad, natabo ang krimen sang kaagahon sa Barangay Carreta sa nasambit nga syudad.
Nakapalagyo naman ang 23-anyos nga suspetsado pagkatapos himuon ang krimen, pero nagsungka man siya sa mga otoridad sang ulihi.
Suno sa suspetsado,iga-celebrate kuntani nila sang biktima ang ila anibersaryo sang gab-i sang Miyerkules gani nagdala siya sang bulak kag tsokolate.
Pero wala ginbaton sang biktima ang iya regalo kag nagsiling nga may bago na siya nga nobyo.
Una man siya nga gintinguhaan nga bun-on sang biktima kag ginpakita pa ang pilas nga sa iya kamot.
Sang maagaw niya ang patalom, ginbuno niya ang biktima, kag ginhampak sang martilyo ang ulo sini.
Nagpangayo man ini sing pasaylo sa iya nga nahimo sa biktima.
Suno sa landlady sang babayi, nagbulagay ang biktima kag ang suspek tungod sang away nila bangod sa bata sang biktima nga daw indi gusto sang lalaki.
Pero ginpili sang babayi ang iya bata gani nagbulagay sila sang suspek, nga mas nagpangakig sa iya.
Samtang, igapaidalum ang bata sa psychosocial intervention ukon debriefing matapos makita ang krimen.
Yara na sa paghinakop sang kapulisan ang mga gingamit sa krimen pati ang suspek nga magapangatubang sang nagkalain-lain nga kaso.
