IVISAN, Capiz – Ang mga biktima amo sanday alyas “Greg”, 66, driver sang tricycle, alyas “Rea”, 63, sakay sang tricycle kag residente sang Barangay Matnog sa nasambit nga banwa.
Samtang ang driver naman sang salakyan nga nagaduag itom amo si alyas “Noel” 57, kag residente sang Barangay Agustin Navarra, Ivisan Capiz kag si alyas Jerome, 48, driver naman sang Van nga nagaduag sang puti residente sang Brgy. Sta Cruz, Ivisan, Capiz..
Sa interview sang Bombo Radyo kay, PMSG. Eduard Peter L. Harion, Traffic Investigator, sang Ivisan Municipal Police Station, iya ginpahayag nga samtang ginasubay sang van ang dalan nagikan sa Barangay Agmalobo kag padulong kon tani sa banwa sang ivisan sang hinali na lang ini nga nag-overlap sa pihak nga linya rason nga na-sideswiped ang tricycle kag deritso nga bumunggo sa isa pagid ka salakyan.
Bangud sa mabaskog nga impact nag-angkon sang nagkalain-lain nga pilas sa magkatuhay nga parte sang ila lawas ang mga biktima.
Gilayon naman nga nagresponde ang mga katapo sang Bureau of Fire Protection Ivisan, kag gindapatan sang pauna nga pagbulong antes ginpadangat sa ospital.
Sa subong, padayon pa ang imbestigasyon sang Ivisan Municipal Police Station sa nasambit ng insidente.
Nagpanawagan man ang natungdan nga maghalong gid perme agud malikawan ang pila ka mga insidente sa dalanon.
