25 ka mga pasahero stranded sa Banica Wharf bangud sa bagyo

ROXAS CITY – Kapin sa 25 ka mga pasahero ang stranded sa Banica wharf matapos kanselahon sang Philippine Coastguard (PCG) –Roxas ang biyahe sang tanan nga sahi sang barko ukon sakayan pandagat kasunod sa pagpaidalum na sa storm signal No. 2 sa probinsiya sang Capiz.

Ginpahayag ni Petty Officer 1st class Allan Gervero, sub-station commander sang PCG Sub-station-Banica nga sakay ang mga pasahero sang duha ka mga motor banca nga wala ginpahanugutan nga makabiyahe bangud sa bagyo.

Kalakip diri ang 4 ka mga pasahero sang Kim Dim 5 nga magapadulong kuntani sa Mandaon, Masbate kag 21 naman sa triple M2 nga ginalakipan sang pito ka mga kabataan kag padulong sa Milagros, Masbate.