ROXAS CITY – Ginpanginwala sang 27-anyos nga biktima nga ginluthang mga alas-11:30 kagab-i sa bahin sang Pavia St. sining syudad nga nagbuya siya sang malain nga tinaga batuk sa mga suspek rason nga nagluntad ang insidente.
Sa interview sang Bombo Radyo kay Vengie Flores, biktima sang pagpangluthang, suno sa iya wala sang kamatuoran nga nagbuya siya sang malain nga tinaga kag wala man niya ginlagas ang L300 van kun sa diin nakasakay ang mga suspetsado.
Matandaan yara sa kilid sang dalan sa may bahin sang Legaspi St. si Flores matapos nahubsan sang gasolina kag nagpangayo sa iya abyan nga manugbulkit sang gamay nga gasolina, apang suno diri madasig nga nag-agi ang van kag nasangit sang side mirror sini ang iya abaga.
Wala man suno diri nag-untat ang nasambit nga van kag ginpabay-an nalang niya, apang sang padulong na siya kuntani sa San Roque Extension agud magpagasolina nasiplatan niya ang van sa bahin sang Pavia St. kag didto niya ini ginkadtuan kag ginkomprontar sang matawhay.
Apang ginpahayag ni Flores nga nagsabat ang isa ka sakay sang van sa iya kag nagsiling “lakat na didto mapatay ka di karon”.
Bangud diri, nagtalikod si Flores kag malakat na kuntani sang hinali nalang nga ginluthang siya sang makatatlo ka beses kun sa diin isa diri ang nag-igo sa nawala nga bahin sang iya tiil.
Ginpadangat si Flores sa Roxas Memorial Provincial Hospital, kag natigayon man ini nga nakaguwa.
Sa karon, padayon ang imbestigasyon sang mga kapulisan sa pagtumod sang mga sakay sang van nagaduag itom nga madasig nalagyo.
Ginpakamaayo ni FLores nga indi nalang magpasaka sang kaso batuk sa mga suspetsado bangud nahadlok siya para sa seguridad sang iya pamilya.
