ROXAS CITY – Kritikal ang 29-anyos nga lalaki matapos nga ginbuno ini sang iya kaugalingon nga Amay, sa Sitio Ilaya, Barangay Dinginan, Roxas City.
Ginkilala ang biktima kay Alejandro Villagracia, may live-in partner kag residente sang nasambit nga lugar.
Samtang ang suspek ang ginkilala kay Alidino Viilagracia, 53-anyos kag residente sang amu man nga barangay.
Sandig sa inisyal nga imbestigasyon sang mga katapo sang Roxas City PNP, nga ginabulubanta alas-9:00 kagab-i, Abril 22, sang updanay nga naga-inom-inom sang makahulubog nga ilimnon ang mag-amay sang nagpatunga sa ila ang mainit nga diskusyon.
Hinali nga ginbuno sang amay ang iya bata, rason nga naigu ini sa dughan.
Gilayon nga ginpadulungan sang mga katapo sang Roxas City Emergency Response Team (RCERT) kag ginpadangat ang biktima sa isa ka pribado nga ospital sa syudad.
Natigayon man nga madakpan ang suspek sang mga katapo sang Brgy. Tanod kag nagapabilin sa karon sa Roxas City PNP.
Nahibaluan nga nauna nga nga ginbuno sang anak ang iya amay sang nakaligad nga mga tinuig.
Sa pihak nga bahin, sa interview sang Bombo Radyo kay Brgy. Kagawad Prudencio Aluad, ginsiling sini nga ba-se sa iya pagpangusisa sa amu nga pamilya, samtang nagapanyapon ang suspek (Amay) ginaalegar ginsumbag ini sang biktima (anak), rason nga nagsabat ang amay nga patapuson lang ini sa pagkaon kay makuha niya gid ang iya ginapangita.
Ginapahayag nga didto na nagsugod ang ila diskusyon kag nakakuha sang hinganiban ang amay nga gingamit buno sa iya anak.
Dugang pa sang Brgy. Kagawad nga ginaalegar gin-akigan sang suspek ang iya apo nga bata sang biktima, rason nga posible isa sa gintunaan sang ila komprontasyon.
Lunsay man suno diri, nakainom sang makahulubog nga ilimnon ang duha.
Sa karon, ginahulat pa ang mangin desisyon sang himata kun magapasaka sang panumbungon batuk sa suspek.
