ROXAS CITY -Ginkompirmar sang pamunuan sang Municipal Disaster Risk Reduction and Management Office sang banwa sang Dumarao nga nakapauli na sa banwa ang mga locally stranded individuals nga nastranded sa Isla sang Boracay kag Metro Manila.
Ginpahayag ni MDRRM Officer Florencio Farinas nga 12 ka mga LSI’s ang nagapadayon sa ila nga 14-day quarantine sa Dumarao Elementary School nga gindesignar nga municipal quarantine facility sang banwa.
Mahibaluan nga 11 ka mga LSI’s ang nagikan sa Isla sang Boracay kag 1 ang nagikan sa Metro Manila.
Gindugang pa ni Farinas nga lunsay nagnegatibo man sa rapid testing ang 12 ka mga LSI’s.
Sa pihak nga bahin nakapauli naman ang 17 mga LSI’s sa banwa sang Dao nga na-stranded sa Isla sang Boracay.
Sa pagpangusisa sang Bombo Radyo Roxas nga sa 17 ka mga LSI’s, tag-3 ang taga-Barangay Poblacion Ilaya kag Matagnop, tag-duha ang taga-Barangay Poblacion Ilawod, Balucuan, Manhoy, Bita kag Agtambi samtang isa naman ang taga-Barangay Lacaron.
