ROXAS CITY – Bukas sa gihapon ang pamunuan sang Barangay 5 sa pagbaton sang mga donasyon nga ibulig sa mga evacuees nga apektado sang paglupok sang bulkan Taal.
Ginpahayag ni punong barangay Lorilee Aguire nga mahimo makapadulong sa ila barangay hall humalin las 8 sa aga tobtob las 5 sa hapon ang luyag magdonar sang anuman nga ila masarangan agud madala ini sa 2nd batch nga donation sang Brotherhood of Capiz Riders sa ini nga semana nga liwat magapadulong sa Batangas para magdala sang matipon nga bulig.
Suno kay Kapitan Aguire nga nagahinyo ang mga evacuees nga madalhan sila sang canned goods, bayo, diaper kag face mask nga isa sa mga primary need sang mga pumuluyo.
Nagalaum man ini nga malampuwasan pa sang grupo ang target nga numero sang face mask nga madala sa Batangas, agud madamo sila sang mabuligan.
