Tatlo ka mga barko sang China Coast Guard (CCG) ang nakit-an nga naga-bracketing pattern sa Batanes.
Ini ang base sa monitoring sang US maritime expert nga si Ray Powell.
Suno sa iya, nagapabilin sa bracketing pattern ang CCG vessels 4304, 3301 kag 3304 tubtob subong nga adlaw, Biyernes, Agosto 8.
Ginsiling sini nga ang bracketing nagakahulugan nga ang mga barko sang CCG nagapatrolya sa nasidlangan kag nakatundan nga bahin sang Batanes.
Suno kay Powell, ang CCG vessel 4304 ang nasiplatan sa 60 nautical miles (NM) west sang Batanes, samtang ang CCG vessels 3301 kag 3304 ang ulihi nga nakit-an mga 70 NM halin sa eastern part sang island province.
Suno kay Powell, importante ini nga development bangud suno sa iya, wala pa gid nakita ang CCG nga nagapatigayon sang intrusive patrols sa nasidlangan nga bahin sang Philippine archipelago sang una.
Madumduman nga halin sang Huwebes, ang mga barko sang China ginabantayan nga nagaagi sa Bashi Channel, nga ginlaragway ni Powell nga isa ka “very unusual track”.
Ini ang labing una nga tion nga nagsiling siya nga may nakita sia nga nagaagi sa Bashi Channel sa madamo niya nga tinuig nga pagbantay sa mga barko sang China sa ginabaisan nga kadagatan kag kaiping nga kadagatan.
