ROXAS CITY – Pilason ang tatlo ka mga construction workers matapos mahulog sa ginatindugan nga dalana nga himo sa butong sa gina-construct nga istraktura sang OPD Department sang Roxas Memorial Provincial Hospital sa Barangay Lanot, Roxas City.
Ginkilala ang mga biktima nga sanday Rodolfo Aguas sang Sitio Pili, Barangay Dinginan, Roxas City, Jun Guzman sang Barangay Milibili, Roxas City kag Ryan Jay Orola sang Tabuc Sur, Panit-an.
Sa exclusive interview sang Bombo Radyo sa security guard sang edipisyo ginpahayag sini nga yara sa ikalima nga panalgan sang edipisyo ang nasambit nga mga trabahador sang hinali nga narumpag ang ila ginatindugan nga dalana sa diin nahulog sila sa duta.
Lunsay nag-angkon sang pilas sa magkatuhay nga bahin sang lawas ang mga biktima nga gilayon gindala sa ospital para mabulong ang ila mga kasamaran.
Padayon sa karon ang imbestigasyon sa insidente agud mahibaluan kun sin-o ang dapat nga magpanabat.
