ROXAS CITY – Malipayon nga gin-anunsyar ni Mr. Alphonsus Tesoro, pinuno sang Provincial Tourism and Cultural Affairs Office (PTCAO) nga nangin madinalag-on kag produktibo ang tatlo ka adlaw nga pagsaulog sang Capiztahan 2022 sa bug-os nga probinsya sang Capiz.
Sa interview sang Bombo Radyo, ginpahayag sini nga apisar ginpaidalum ang probinsya sa state of calamity, nag-desider ang ila talapatan nga ipadayon ang selebrasyon bangud tinutuyo sini nga mabuligan ang mga mangunguma nga tuman ka apektado sang pagbaha nga tuga sang bagyong Agaton.
Bangud sa kalamidad nga na-ekperensyahan sang probinsya wala natigayon ang kinaangdan nga Seafood Buffet bangud sa pagbaha.
Suno diri, ang amo nga selebrasyon isa ka economic recovery sa bug-os nga probinsya kag psycho-social healing para sa mga Capizeños pinaagi sa pagtan-aw sang mga cultural events nga ginhiwat online.
Malipayon man nga ginpakigbahin ni Tesoro nga nakatipon sang kapin P800,000 nga gross sale ang Manindahan ‘Ta A Street Market Garden Fair.
Ginapasalamatan man sang opisyal ang epeiktibo kag wala tupong nga pagserbisyo sang mga kapulisan agud mapabilin nga malinong kag matawhay ang selebrasyon sang Capiztahan.
