ROXAS CITY – Ginserbehan sang gintingob nga pwersa sang CIDG Capiz kag Roxas City PNP sang search warrant naangut sa paglapas sa R.A 9516 ukon “Illegal Possession of Explosives” ang tatlo ka mga babayi sa Happy Homes Subdivision, Barangay Sibaguan, Roxas City mga alas-11 kaina sang udto.
Ginkilala ang mga suspetsado nga sanday Cirila Cordon Estrada alias “Cora” ukon “Sheila Gonzales”, Lenilyn Custorio Jaynos alias “Sadra” ukon “Elizabeth”, kag Marivie Bartolome Arguilles lunsay residente sang nasambit nga barangay.
Apang, si Jaynos lamang ang ara sa nasambit nga puluy-an sang ginpatigayon ang operasyon sang otoridad.
Nakuha sa posesyon ni Jaynos ang 2 ka granada, 2 ka calibre .45 nga armas-luthang kag kapin 82 ka mga bala sini.
Ginapahayag may nakita sa sulod sang puluy-an nga tarpaulin sang Gabriela, isa ka progresibo nga grupo nga masami nagapatigayon sang hublag-protesta sa syudad.
Ginaalegar miyembro sanday Estrada, Jaynos kag Arguilles sa nasambit nga grupo.
