ROXAS CITY – Arestado ang tatlo ka mga drug suspek sa separado nga operasyon sang Station Drug Enforcement Team sa Barangay Tiza, Roxas City kagab-i.
Una nga nagpatigayon sang operasyon ang hubon sa diin naaresto sanday Micheal Funa 36-anyos sang Inzo Arnaldo Village kag Gerone Deocampo 33-anyos sang Barangay Lawaan, sining syudad sa Barangay Tiza.
Nakuha sa duha ang lima ka sachet sang ginapatihan shabu nga gindala na sa regional crime laboratory para sa laboratory analysis.
Indi magnubo sa lima ka gramus sang droga ang nakumpiskar sa duha sa diin ginabulubanta nga nagabalor ini sang P60,000.
Narekober kay Funa ang duha ka plastic sachet, isa ka cellphone kag ang motorsiklo nga ila ginagamit sa mga transaksyon samtang tatlo ka plastic sachet naman ang nakuha kay Deocampo kag ang marked money nga P1,000.
Samtang pila ka oras lamang ang nagligad kagab-I, liwat naman nga nag-operate ang kapulisan sang Roxas City PNP, kag naaresto naman si Mariam Fancuga 29-anyos sang Barangay Punta Tabuc, Roxas City.
Narekober diri ang anum ka sachet sang ginapatihan shabu, buybust money, cellphone, P1,000 nga marked money, pouch kag envelope nga nagaunod sang P500.
Sa karon lunsay nakahunong na sa karsel sang Roxas City PNP ang tatlo ka mga drug suspek.
