ROXAS CITY – Dakop ang 3 ka mga persona nga ginakabig High Value Individual (HVI), matapos ang ginkasa nga drug buy-bust operation sa Sitio Hermano, Barangay Punta Tabuc, Roxas City.
Ginkilala ang mga nagkaladakpan nga sanday Mark Legaspi, 36-anyos, tricycle driver kag residente sang Barangay Sibaguan, Rene Legaspi, 66-anyos residente sang Sitio Hermano, Barangay Punta Tabuc lunsay sining syudad kag Bonnie Besonia, 38-anyos, construction worker kag residente sang Mambiran, Calinog, Iloilo City.
Sa impormasyon nga nakuha sang Bombo Radyo nagikan sa Roxas City PNP, natigayon nga madakpan ang tatlo ka mga persona pinaagi sa gintingub nga pwersa sang Philippine Drug Enforcement Agency (PDEA) Regional Office 6 kag Roxas City PNP kag pulis nga nagpakuno-kuno Poseur Buyer.
Nakuha sa paghinakop sang mga ini ang 24 tanan ka sachets sang ginaalegar shabu nga may kabug-atun 125 gramos kag Standard Drug Price P850,000.00, P20, 900 nga buy-bust money, P100.00 nga boodle money kag mga drug paraphernalia’s.
Kaso nga paglapas sa Republic Act 9165 ukon Comprehensive Dangerous Drugs Act of 2002, ang paga-atubangon sang nasambit nga mga nagkaladakpan.
Sa karun yara na ang mga ini sa kustodiya sang Roxas City PNP, para sa nagakaigo nga disposisyon.
