ROXAS CITY– Patay ang tatlo ka mga mag-ulutod matapos malumos sa isa ka dam sa Barangay San Antonio Tapaz, Capiz.
Ginkilala ang mga biktima nga sanday Princess, 12-anyos, Lycel, 14-anyos kag Leah Pascua, 15-anyos lunsay residente sang Barangay San Julian sa amo man nga banwa.
Sa interview sang Bombo Radyo kay Tapaz PNP chief PSI Edwin Luces nga nagpadulong ang mga mag-ulutod kaupod sang ila mga pakaisa agud mamunit sang mga isda sa nasambit nga dam.
Mahibaluan nga ginkasugtan sang mga ini nga maglangoy sa nasambit nga dam apang dimalas nga nakadanlog si Princess rason nga ginluwas sang iya duha ka mga magulang.
Apang ginapayahag nga wala na nakabutwa ang tatlo matapos gin-anod sa madalom nga porsyon sang dam.
Gintinguhaan pa nga madala ang tatlo sa ospital apang gindeklarar ang mga ini nga dead on arrival sa ospital.
