ROXAS CITY – Patay ang isa sa tatlo ka mapakaisa samtang duha ang pilason matapos nabun-an sa rambol sa guwa sang binaylihan sa Sitio Camerin, Barangay Malocloc Norte, Ivisan, Capiz.
Ginkilala ang napatay nga si Ryan Ureta 20-anyos nga nag-angkon sang pilas sa tiyan matapos ginbuno sang suspek nga si Ariel Unarce.
Padayon naman nga ginabulong sa ospital ang duha ka mga pakaisa ni Ryan nga sanday Cyril Ureta kag Jecris Bacarro.
Sa interview sang Bombo Radyo Roxas kay Police Staff Sgt. Emilo Ubalubao, imbestigador sang Ivisan PNP, ginpahayag sini nga yara pa lamang sa sulod sang binaylihan may tima tima na ang grupo sang mga biktima kag suspek, tobtob sa ila nga pagguwa nagrambol na ang duha ka grupo.
Wala lamang ginalauman sang mga biktima nga may kutsilyo ang suspek nga gingamit sa pagpangbuno sa tatlo ka magpakaisa.
Naaresto sang mga pulis si Ariel Unarce, isa sa tatlo ka mga suspek matapos gintudlo sang biktima nga si Cyril nga amo ang nagbuno sa iya.
Padayon naman ang imbestigasyon sang pulisya para matumod kun sin-o ang nagbuno sa napatay nga si Ryan.
