ROXAS CITY – Dakop ang tatlo ka mga persona sa separado nga buybust operation nga ginpatigayon sang mga katapo sang Provincial Drug Enforcement Unit (PDEU) sang Capiz Police Provincial Office sa Barangay Cagay kag Barangay Banica, Roxas City.
Sa interview sang Bombo Radyo kay Police Lieutenant Colonel Mark Anthony Garcia, team leader sang PDEU, nadakpan ang duha ka mga suspetsado sa Barangay Cagay nga amo sanday Zymon Balbona, 28-anyos kag Juan Delos Santos, 43-anyos nga lunsay mga residente sang Barangay Tanque kun sa diin nakuha sa ila posisyon ang anum tanan ka sachets sang ginapatihan nga shabu, 500 pesos nga marked money kag isa ka motorsiklo.
Suno kay Garcia nga madugay na nga ginpaidalum sa monitoring ang mga suspek antes ang madinalag-on nga operasyon sang mga kapulisan.
Samtang, dakop man ang top 3 Directorate for Inteligence (DI) listed sang Capiz-PPO nga si Hans Wilhalm Demalata, 25-anyos sang Sitio Caduolan, Barangay Banica sining siyudad.
Narekober naman sa posisyon sang arestado ang pito ka sachets sang ginapatihan nga shabu, cellphone kag P500 nga marked money.
Samtang, natalana naman nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002 ang mga suspetsado.
