ROXAS CITY – Pilason ang duha ka mga persona matapos ang nagluntad nga pagbungguanay sang tatlo ka mga salakyan sa national highway sang Poblacion Sur, Sigma, Capiz.
Ginkilala ang napilasan nga sanday Ernesto Villanueva, 50-anyos, kag driver sang Rusi nga traysikol, kaupod ang pasahero nga si Vergie Toledo, sa legal nga edad nga lunsay residente sang Poblacion Norte, sa amu nga banwa.
Sandig sa inisyal nga imbestigasyon sang mga katapo sang Sigma MPS, ginasubay sang driver sang Toyota Hilux nga si Charlton Romero, 31-anyos kag residente sang Sta. Barbara Nabua, Camarines Sur ang dalan nagikan sa Brgy. Guintas, Sigma padulong sa direksyon sa banwa sang Dao, sang gulpi nagliko ang kasugata nga traysikol, rason nga bumunggo ini sa nauna nga bahin sang Hilux.
Apang, gintinguhaan sang driver sang traysikol nga magbalik sa lugar apang bumunggo ini sa nagapadulong nga Fuso Canter nga ginamaneho ni Josefino Jacinto, 58-anyos kag residente sang Brgy. Mangoso, sa banwa sang Sigma.
Bangud diri, nag-angkon sang kapilasan sa magkatuhay nga parte sang lawas ang duha ka mga sakay sang traysikol nga ginpadangat sa Dao District Hospital para sa pagbulong.
Ginkustodiya sa Dao MPS ang mga nadalahig nga mga salakyan.
