ROXAS CITY – Indi na pagpasakaan sang Philippine Coconut Authority (PCA) ang tatlo ka mga persona nga nadakpan nga nagapatigayon sang illegal logging sa Sitio Barusbus, Barangay Lonoy, Sapian, Capiz.
Ini ang ginpahayag ni Police Master Sergeant Wilmer Peral sang Sapian Municipal Police Station sang mainterview sang Bombo Radyo.
Ginkilala ang nasambit nga mga persona nga sanday Ernesto Policarpio 63-anyos, Elmer Obamos 48-anyos kag Elegen Obamos 18-anyos nga lunsay mga residente sang nasambit nga barangay.
Mahibaluan nga nadakpan ang nasambit nga mga persona nga nagapatigayon sang illegal logging kun sa diin kalakip sa ila mga ginpang-utod nga mga kahoy amo ang germilina tree kag puno sang kahoy sang lubi.
Nakumpiskar naman sang mga otoridad ang pila ka mga kahoy kag ang gingamit nga chainsaw yara na karon sa kustodiya sang Sapian PNP.
Samtang, ginhatagan naman sang tsansa sang PCA ang nasambit nga mga persona kag ginpanugyanan nga indi na ini paghimuon.
