ROXAS CITY, CAPIZ – Ipatuman na sang Department of Education (DepEd) ang Academic Recovery and Accessible Learning ukon ARAL Reading Program sa Second Quarter sang School Year 2025-2026.
Sa eksklusibo nga interview sang Bombo Radyo Roxas kay Hernanie Escullar, Jr., Spokesperson sang DepEd Western Visayas, gintuad sini nga tinutuyo sang nasambit nga programa nga solusyonan ang naga-eksister nga krisis sa pagbasa sa pungsod.
Base sa DepEd Memorandum No. 64, ginmanduan ang tanan nga eskwelahan nga tumanon ang phased rollout sang programa agud mabuligan ang mga estudyante nga nagakaulihi sa ginalauman nga lebel sang ikasarang sa pagbasa.
Pinaagi sa ARAL, ginalauman nga makalagas ang mga estudyante nga ini sa gintalana nga basehan sang ahensya. Dugang pa ni Escullar, ginabanta nga malab-t sa tatlo ka million gikan sa kabug-usan nga 24 million nga enrollees sa pungsod ang nabudlayan sa gihapon sa functional literacy, base sa ginpatigayon nga assessment sang DepEd.
Ginalauman nga magasugod ang implementasyon sang programa sa third quarter para sa Grade 1, samtang sa Grade 2 kag 3 ang suguran na sa ikaduha nga grading sang pareho nga school year.
Para naman sa Grades 4 tubtob 10, posible nga magaarangkada man ini sa ikaduha nga grading depende sa kahandaan sang mga buluthuan.
Ginpahayag man ni Escullar nga gamiton ang Comprehensive Rapid Literacy Assessment (CRLA) para sa mga yara sa Grade 1 tubtob 3, kag ang Philippine Informal Reading Inventory (Phil-IRI) naman para sa Grades 4 tubtob 10 agud matumod kun sin-o ang mga estudyante nga dapat malakip sa programa.
– Interviewed by: Bombo Lynd-C Bade
