ROXAS CITY – Arestado ang isa ka lalaki matapos nadakpan nga nagapatigayon sang iligal nga pasugal sa Malipayon Village, Barangay Tiza, Roxas City.
Ginkilala ang nadakpan kay alyas Duko 30-anyos nga residente sang Brgy. Banica sini nga syudad.
Sa nakuha nga impormasyon sang Bombo Radyo nagikan sa Roxas City Police Station, samtang nagapatigayon sang anti-illegal gambling operation ang mga katapo sang kapulisan, naaktuhan nga nagapataya sang iligal nga pasugal nga ginatawag “STL bookies” ang amo nga persona.
Narekober sa nadakpan ang isa ka pad nga papel, P150 nga cash sa nagkalain-lain nga denominasyon; ballpen,kag iban pa nga mga gambling paraphernalia.
Magapangatubang sang kaso nga paglapas sa Presidential Decree 1602 nga gin-amyendahan sang RA 9287 ukon ‘Anti-Illegal Gambling Law’ ang nasambit nga persona.
Sa karon, yara na sa kustodiya sang Roxas City PNP ang nasambit nga persona para sa nagakaigo nga disposisyon.
