Ginbawian sang hulam nga kabuhi ang isa ka 30-anyos nga lalaki matapos aksidente nabungguan sang SUV sa Barangay Manhoy, Dao, Capiz.
Ginkilala ang biktima kay alyas “Rene” kag residente sang Sitio Ilaya, Brgy. Quinayuya, banwa sang Dao.
Sa nakuha nga inisyal nga impormasyon sang Bombo Radyo nagikan sa Dao Municipal Police Station, ginapahayag nga samtang nagatabok ang biktima sa lugar hinali nalang ini aksidente nga nabungguan sang nasambit nga SUV.
Bangud sini, nag-angkon sang patal nga pilas ang biktima sa magkatuhay nga parte sang lawas kag madasig nga ginpadangat sa Dao District Hospital, apang gindeklarar ini nga dead on arrival.
Madasig naman nagpalagyo ang nasambit nga SUV padulong sa direksyon pa-Iloilo.
Sa karon, nagapadayon ang maid-id nga imbestigasyon sang kapulisan angut sa nasambit nga insidente kag pag-ayam sa driver sang amo nga salakyan.
