Ginkumpirmar sang Department of Foreign Affairs (DFA) nga nag-abot na sa Pilipinas ang limitado nga numero sang 300 Afghan nationals nga ang katunga mga minors.
Ginalauman nga magapabilin ang mga ini sa pungsod sa sulod sang indi magnubo sa 59 ka adlaw samtaang ginahulat sang mga ini nag maproseso ang ila nga Special Immigrant Visas applications sa US Embassy sa Manila antes dalayon nga makasaylo kag didto na magatinir sa Amerika.
Ini ang epekto sang temporary arrangement sa tunga sang US kag Pilipinas nga gin-aprubahan ni Pangulong Ferdinand Marcos Jr. sadtong Setyembre 25, 2024 sa pihak sang mga ginakahangaw-an sang pila ka mamalidha sa potensiyal nga pamahog sa seguridad kag legal issues sa pagpabilin sang nasambit nga mga Afghan national sa aton nga pungsod.
Apang una na nga gin-athag nga ang nasambit nga Afghan nationals ang indi refugees kag indi makatuga sang pamahog sa seguridad sang Pilipinas.
Suno diri nga ang 300 Afghan nationals ang nagatrabaho didto sa Afghanistan para sa Amerika nga nabilin sang liwat nga ginsakop sang militante nga Taliban ang Afghanistan sadtong 2021.
Suno naman kay Foreign Affairs Spokesperson Ma. Teresita Daza, gin-isyuhan sang DFA sang nagakaigo nga Philippine entry visa ang nasambit nga mga Afghan national sandig man sa mga naga-exist nga pagsulundan kag mga regulasyon.
Nagpaidalom man ang mga ini sa full medical screening antes nag-abot sa pungsod.
Temporaryo nga magapabilin ang mga ini sa isa ka wala ginhingadlan nga pasilidad nga ginpondohan sang US government kag kargo man sini ang tanan nga kinahanglanon nga mga serbisyo sang mga Afghan nationals kalakip ang ila nga pagkaon, ilistaran, medical care, seguridad kag transportasyon tubtob nga makumpleto ang pagproseso sa ila nga US visa.
Gin-athag man sang DFA official nga indi pag-ipahamtang ang mga Afghans sa anuman nga EDCA sites sa pungsod. Ang staff nga ginkontrata sang US government ang magahatag sang seguridad sa mga ini sa nasambit nga premises, kun sa diin tanan nga ini ang yara sa idalom ang direct supervision sang Philippine National Police (PNP).
