Naglab-ot na sa 31 ka mga loose firearms ang nakumpiska sang Roxas Component City Police Station bilang kabahin sang kampanya kontra sa ilegal kag wala narehistro nga mga armas.
Sa interview sang Bombo Radyo kay Police Lieutenant Colonel Rogelio Tomagtang Jr., Chief of Police sang Roxas Component City Police Station, iya ginpahayag nga 26 sa 46 ka mga barangay sa syudad ang nagkooperar sa kampanya sang kapulisan.
Suno kay Tomagtang, ginapatigayon ang amo nga programa sa idalom sang RTT 3389, nga nagakahulugan sang Restrict, Track, and Turn-in, agud matapna ang mga ilegal kag indi rehistrado nga sahi sang armas luthang.
Nagpanawagan naman ang natungdan sa mga nagapanag-iya sang loose firearms nga iturn-over ini sa mga otoridad agud malikawan ang posible nga paggamit sa mga krimen.
Pinaagi sa amo nga programa matapna ang mga insidente kag krimen nga mahimo matabo bangod sa paggamit sang mga indi lisensyado nga armas luthang.
